JENNY MARX

জেনী মাৰ্ক্স (১৮১৪-১৮৮১)৷ আচল নাম বেৰ’নেছ উপাধিৰে জোনানা বাৰ্থা জেনী ফন ৱেষ্টফালেন৷ এইগৰাকী অতুলনীয় নাৰীক কাৰ্ল মাৰ্ক্সৰ পত্নী বুলি থোৰতে জনা যায়৷ কিন্তু বহুতেই হয়তো নাজানে কিদৰে অঘৰী মাৰ্ক্সৰ ভাগ্যৰ লগত নিজৰ সুখ-দুখ, বৰ্তমান আৰু ভৱিষ্যৎ একাকাৰ কৰা জেনী নামৰ এইগৰাকী মহান মহিলাই মাৰ্ক্সৰ বৌদ্ধিক সাফল্যৰ প্ৰতিটো স্তৰত নিজৰ বৰঙণি দি থৈ গৈছে৷ বয়সত মাৰ্ক্সতকৈ চাৰি বছৰে ডাঙৰ, অতিকৈ অপৰূপা আৰু মৰম লগা জেনী ল’ৰালিতে মাৰ্ক্সৰ খেলাধূলা কৰা লগৰী আছিল৷ পাছত মাৰ্ক্সৰ সহধৰ্মিণী, গৃহিণী আৰু সহকৰ্মী হিচাপে তেওঁৰ সকলো কামত প্ৰেৰণা আৰু সহযোগিতা আগবঢ়াই  ইতিহাসৰ পাতত এক বিশিষ্ট স্থান অধিকাৰ কৰি ৰখা জেনীৰ জীৱন-কাহিনী হোমেন বৰগোহাঞি সম্পাদিত অধুনালুপ্ত আলোচনী সূত্ৰধাৰত ধাৰাবাহিকভাৱে প্ৰকাশিত হৈছিল ১৯৯০ চনৰ বিশেষ বিহু সংখ্যাৰ পৰা৷ আমাৰ সেই লেখা পঢ়ি কেইবাজনো ব্যক্তিয়ে আমাক কিতাপ আকাৰত এই জীৱন-কাহিনী প্ৰকাশ কৰিবলৈ উপদেশ দিছিল৷ একেধৰণে টানি ধৰিছিল কিছুদিন ধৰি মোৰ পত্নী ৰুবী, পুত্ৰ ছাজিভ আৰু কন্যা ৰুজাই৷ আগৰ লেখাৰ বিশেষ সলনি নকৰাকৈ দুই-এটা নতুন কথাৰ সংযোজন কৰি জেনী মাৰ্ক্সৰ জীৱন-কাহিনী কিতাপ আকাৰত পুনৰ লিখি উলিয়াইছিলোঁ৷ এতিয়া জ্যোতি খাটনিয়াৰ আৰু আৰিফৰ তাগিদাত ডিজিটেল ৰূপত প্ৰকাশ কৰিছোঁ৷